Бозмаст хинна лувчаду сахьаташ аз,
Сона тlехьа зама а кхувц, из а яц раьза.
Бlалгlа хинна гаьннара кхоане хьайоагl,
Анайист ювла гуча ловзадеш дlоагlа.
Дац дувгlаш ла, фаьрга оаз хийла,
Екаш хул маьлхара, геттара гlийла.
Кlибиска чу готаденнад дог аьнна, аргдолаш,
Тиша ди хьо ма да, хьайца кхоане йолаш.
Меноташ хьувза хийла, са даккха гlерташ,
Юххьера а уйлаш хул дагаръеш мерташ.
Хьо дуне даькъаза хинна дlа ма отталда,
Керда мугlа буллача хана са дог ураотталда.
Лувчаду бозмаст хинна сахьаташ аз,
Сона тlехьа зама а кхувц, из а яц раьза.
Бlалгlа хинна гаьннара кхоане хьайоагl,
Анайист гучаяьнн, ловзадеш хул дlоагlа.
Гlермане, 30. Аьтинга бетта 2013 шу
Бозмаста ха
© Copyright: Микаил Сапралиев, 2013
Свидетельство о публикации №113063006839
Свидетельство о публикации №113063006839
Рецензии