Эвелдилай чаз чидачир,
И савдадиз жедач эхир,
Аян тийин виридаз сир,
Ша,чара жен хъуьрез-хъуьрез.
Амачир чаз йифен ахвар,
(Гьиниз фена а байихар?)
Авадармир гила накъвар,
Ша, чара жен хъуьрез-хъуьрез.
Кумач хьи ви кIвачерик звер,
ИчIи хьанва чи гьуьлуьн кьер…
Деринармир рикIевай хер,
Ша, чара жен хъуьрез-хъуьрез.
Аквазва заз ви къайивал,
Ваъ, за тахсир вегьизвач вал,-
Белки хъсан я хьайивал,
Ша, чара жен хъуьрез-хъуьрез.
Вун галачиз дар яз шегьер,
Уьмуьрдикай жеда зегьер,
КъвезватIани залум къегьер,
Ша, чара жен хъуьрез-хъуьрез…
Ша, чара жен хъуьрез-хъуьрез...
© Copyright: Билал Адилов, 2013
Свидетельство о публикации №113061903918
Свидетельство о публикации №113061903918
Рецензии