Диде Предыстория песни...

И дуьнядал заз сифтени сифте багьа я зи диде. Виридаз гьак1 я, заз чида. И кардиз килигна, гьи газетда, ктабда, шиирда ДИДЕ лагьай т1вар алай зат1 акурт1ани, ам заз, зи рик1из гзаф иер аквада.
Накь заз Дильмира Ашурбековади кхьенвай «Дидедин хайи йикъаз» т1вар алай мани акуна. Заз накьан югъди фикирри секинвал ганач. «Яраб вучиз и шиир кхьейди ят1а? Ам нин хатурдай кхьенвайди я? Музыка нинди ят1а?» -и суалар са шумудра за жува жуваз гана. Цаз къекъведайдан к1вачиз акьахда лагьана бубайрин мисалдин ван хьайиди я заз. Суалар  за Дильмирадиз вичизни гана.  Ада заз и манидин тарихдикай ахъайна. 1мартдиз Диляра Надыровади –  Дагъустандин филармониядин солистка – вичин сад лагьай (сольный) концерт ганай. Концертни дидедиз бахш авунвайди тир. И йукъуз Дилярадин дидедин юбилей тир – 70 йис. Концерт жез са  шумуд йугъ амаз адан фикирдиз вичин дидедиз ихьтин юбилейдин йукъуз дидедикай ц1ийи мани (Дилярадиз дидедикай мадни ава манияр) лугьуз к1ан хьана. Ада вичиз танишзавай Дильмирадивай т1алабна гафар кхьин.  «Диляради заз лагьана, дидедин хайи йикъаз мани кхьена к1анда. За жаваб гана  гафар завай са йифизни кхьиз жеда" Ингье, Дильмиради Дилярадин т1алабун кьилиз акъудна. Дильмиради и ч1ал Дилярадин дидедиз вичин хайи дидедиз хьиз михьи рик1елай бахшна. Гьа ик1 заз иер акур мани "Дидедин хайи йикъаз" къейдна арадал атана.

Адан гафар ингье:

Дидедин хайи йикъаз

Хайи йикъан ви шад межлис рик1еваз,
Мубаракиз атанва чун, диде ваз.
Экуь дуьнья чаз къалурай рагъ, диде!
Вун акурай чаз гьамиша сагъ, диде!

Ширин диде,женнет багъдиз тир ухшар,
Пудкъанни ц1уд хьанава къе ви яшар.
Мекьи ч1авуз чаз чим гайи гад, диде,
Кьисмет хьурай ваз гьар са югъ шад, диде!

Гегьенш хьана рик1е авай хиялар,
Бахтлу яз ваз акурай ви аялар.
Ваз акуна шад мехъерар хтулрин,
Баде хьурай, диде, вакай птулрин!

Вун галачир гьар са югъ чаз серин я.
Куьз лагьайт1а вун веледриз ширин я.
Диде чан, вун,чи уьмуьрдин даях я.
Вун веледрин куьтягь тежер дамах я!

Припев:-
Диде чан,вун хайи
Югъ,мубарак хьурай ваз!
Сад Аллагьди,чан сагъ яз,
Яргъи уьмуьр гурай ваз!

Диде чан, ваз, дердер мад
Ахварайни такурай!
Вун веледриз гьамиша
Шад-хурам яз акурай!

Диляради и мани вичин дидедиз сегьнедал эверна лагьана. Яб це куьнени.

dilyaranadyirova.ru