Заз кIан хьана вун рикIелай алудна,
ТIинкI эцигун азабризни гъамариз,
Зун къунавай и авсият галудна,
Нефес къачун кьезил-кьезил камариз.
Заз кIан хьана цIар чIугван ви тIварцелай,
Чуьнуьхуьн ваз авай гьиссер деринда -
Лазим туш заз бегьер ашкъид тарцелай,
Ял ягъада са къвавахдин серинда!
Заз кIан хьана телефонар кIукIварин,
Тежедайвал завай зенгер куь патаз,
Гьич тахьайтIа, гила са вил ахварин -
Гьикьван чIав я са секинвал амач заз.
Заз кIан хьана… амма завай алакьнач,
Чанда авай и кIанивал акъудиз.
Вун тек туна яргъариз физ алахъна,
Амма хьанач руьгь тандивай къакъудиз…
Заз кIан хьана цIар чIугван ви тIварцелай...
© Copyright: Билал Адилов, 2013
Свидетельство о публикации №113060407383
Свидетельство о публикации №113060407383
Рецензии