Дагъдин тlул. Зулун Бере.
Сивел мили хъвер алаз,
Ярх хьан зун кlунтlун кlане,
Ктаб кlелиз яр галаз.
Са арада акъатна гар,
Чlулав цифер атана.
Рап-рапиз акатна хар,
Рушай «гьарай» акъатна.
-Марф дередиз къвезва яр,
Ша,хъфиз рекье гьатин чун.
Я тахьайтlа жагъур тар,
Гьа тарцик фад катин чун.
Акатзава къати хар,
Чуьллер михьиз гатазва.
Са кlус яргъай мегъуьн тар,
Вилериз зи аквазва.
Кьелечl партал-кьунвай зун,
Зи яр,ам лап кьежизва.
Ша,фад,тарцик катин чун,
Фад,зи беден ракъизва.
Атай къати селдикай,
Гьа тарци чун чуьнуьхда.
Рахаз багъри элдикай,
Къати хардиз килигда.
Са арада катда циф,
Пагь,экъечlда хважамжам.
Селдин гьунар жед зайиф,
Къушари яда макьам.
Хкахьда сел,хъфида циф.
Кlвалин рехъ гьат хъийида.
Къведалди дередиз йиф,
Хъуьруьз чун кат хъийида.
Сувун Тlула
© Copyright: Владик Батманов, 2013
Свидетельство о публикации №113021306229
Свидетельство о публикации №113021306229
Рецензии