Корах летад лира лайчиллан арч,
Гуйре йод гlорья ший хьестаеш гlойле.
Замано сурт диллад, къилбаседера саьрч,
Кхераме гlулакхаш, унзара хьойле.
Кхийнав хьа оазонхо, доглоацорг елх,
Гlор кхийнад гучох цун дега чу.
Цо йоазув дой, кхоачаргва жlелх,
Вампал кхув зlамига цун дега чу.
Лайчиллан зиза, хьа фу бехк ба,
Эзар догараш хьона тlа болх бийя.
Хьа бlаргхиш дарз хиле увгlаш хургда,
Леларгва оазонхо белхаш дицдийя.
Гlаба теха латтаргья зизай беш,
Сахьато гlайгlане гlоаролг ший кхестош.
Къилбаседера саьрч дарга беттаса хьеж,
Ший бийста марс седкъашца доал из хьестош.
Гlермане, 27. Лайчилла бетта 2012 шу
Лайчиллан арч
© Copyright: Микаил Сапралиев, 2012
Свидетельство о публикации №112112708021
Свидетельство о публикации №112112708021
Рецензии