Лугьузва на «зун рикIелай алуда,
Хъсан жеда кьведазни, икI хьайитIа;
Авсиятар на захъ галаз галуда-
ТIварни къамир, гьижранди вун кайитIа».
Лугьузва на «и чIавалди акунач
Ихьтин гьиссер, и шадвилер, и гъамар,
Сифте, чимиз, зун гъавурда акьунач,
Гар акатна, йигин хьана зи камар».
Лугьузва на «амма геж я гила чаз,
Алахъда зун, чандивай чан къакъудиз,
Им вахтар туш, галтугардай бахтар къаз,
ЦIиргъинаваз крар сад-сад агудиз…»
Бес лагь, вучиз ви вилерал нагъв алай?
Чаравилиз вавай таб гуз жедатIа?
Чидач, валай яраб кьвед-пуд йикъалай,
«Багъиша зун» лугьуз, мад чар къведатIа?
Лугьузва на...
© Copyright: Билал Адилов, 2012
Свидетельство о публикации №112071404351
Свидетельство о публикации №112071404351
Рецензии