О, птушкі! Ціўкаюць, звіняць,
Шапочуць, каркаюць, шчабечуць…
Яны не могуць не спяваць,
Не перагуквацца аб нечым.
У тым – прырода іх і лёс,
Патрэба іх і асалода –
Заводзіць спевы да нябёс –
Штодня, не гледзячы на моду.
І песень тых не параўнаць,
Як не злічыць іх шматгалоссе -
Усім на свеце дагадзяць,
Бо ўсе майстэрскі сола ўзносяць.
Рулады, трэлі, перасвіст,
Каленцы, ўздохі, пераборы…
І кожны – творца і артыст.
Ці скажаш, лепей з іх каторы?
Вось так і я. Хоць як паэт,
Бадай, каштоўнасці не маю,
Нястомна вершы ў белы свет,
Бы песні птушка, уздымаю.
Няхай ляцяць, куды падзьме,
Ў чыю душу пагоніць ветрык,
Каб сэрца шчырае мае
Спявала-дыхала ў паветры.
Мо і занадта просты спеў
І дзе-нідзе не тыя словы...
Ды свет бы радасці не меў,
Каб не птушыныя размовы.
15.06.2010
О, птушкi...
© Copyright: Демьянова Татьяна Дмитриевна, 2012
Свидетельство о публикации №112052602878
Свидетельство о публикации №112052602878
Рецензии