Заз акуна вун, иерди, ахварай,
КIанивилин шербетдив заз гана чим,
КIелнай ихьтин ашкъи жеда, махварай,
Низ чидай хьи, зи кьилелни къведа им.
Агь, вуч иер милиди тир акунар!
Са легьзеда чир хьана заз ви къадир,
Икьван хци жедай кьван вуч кьатIунар,
Мецел алай гьар са гаф - са жавагьир…
Я тухдалди ваз килигиз агакьнач,
Гьич тIвар кьванни жузаз хьанач агатна.
Цуьк пIузарриз са темен гуз алакьнач,
Суьгьуьр хьтин алемдикай къакъатна.
Уях хьана – рагъ алай югъ мичIи тир,
Гъил фенач зи са кеспидал, крарал.
Вун авачир и дуьня гьикI ичIи тир -
Саф байихар вегьей гьакIа кIурарал.
Гила ама зун, пагь атIай сефил хьиз,
РикIе аваз таниш тучир са гьарай,
Умуд галаз фад йиф атун гуьзетиз,
АхквадатIа мад вун, лугьуз, ахварай…
АхквадатIа вун ахварай
© Copyright: Билал Адилов, 2012
Свидетельство о публикации №112051810342
Свидетельство о публикации №112051810342
Рецензии