Гъурбеттеки сойдашларымызгъа

Анасы: (ихтияр апайнынъ дертли сеси)

Ах меним эвлядым, саф козьлю мелегим,
Сен догъгъан аньде нур толды юрегим.
Дюньягъа кельди Къырымнынъ бекчиси,
Дагъ, чёллер батыры, денъиз эльчиси.
Мен сени ичирдим энъ темиз чокъракътан,
Бешикни ясадым энъ юксек дагълардан.
Къырымдан чыкъкъанда кучьлю ель эсти,
Орманлар, къаялар агълады инъледи.
Теректен узакъ тюшмесинъ мейвалар,
Узакъча тюшселер табиат агълар.
Къайт балам эвине, етер къазангъанынъ,
Бу фаний дюньяда сув кибидир алтын.
Саипни бильсинъ артыкъ бу азиз топракъ,
Эвлядыны тойдурсын энди багъча-багъ.
Кеткенде янымда тут мени къолумдан,
Башкъаджа, инан, мен раат оламам.

Келини: (яш къадыннынъ севдалы сеси)

Эй Къырым батыры, къаянынъ озю,
Санъа бакъкъанда севине козюм.
Къолларынъ алтын, юрегинъ атеш,
Не керек санъа о ят Марракеш?
Юзюм дюльбер, сачымда ай йылдызы,
Анги каинатта табылыр айнысы?
Коксюме токъунмакъ тек сенинъ акъкъынъ,
Кульгенимни эшитмек тек сенинъ ферагъынъ.
Эджнебий козьлерге мен бакъмакъ истемем,
Хазине багъышлап чагъырсалар - кетмем.
Къайт, джаным, берабер кезейик яйлада,
Къол къола чичек топлайыкъ дагъларда.
Тоюмызда янгъырасынъ джанлы хайтарма,
Тувгъанларны тойдырсын леззетли сарма.
Дамла дамла ташларны деледжектир сель,
Мен беклерим сени, сен етер ки кель.

Догъмагъан къызы: (кичкене баланынъ кедерли сеси)

Анамны севип келин алмасанъ, батыр,
Ким бабам олур, ким мени догъурыр?
Кунь ачылыр мы Къырымда - санъа багълы,
Терек мейва берсинъ – олурсынъ сен хакълы.
Тюшюмде корьдим нур толу козьлеринъни,
Бир вакъыт унутмам насихат сёзлеринъни.
Сенинъ киби йигит бир де бабам олса,
Энъ услу къызынъ олыр сенинъ айса.
Шубем ёкъ Къырымда иш тападжагъындан,
Тек риджам - тюшюрме мени куджагъындан.
Къайт, бабам, асрет къалдым шакъаларынъа,
Сачымны шефкъатнен охшагъан къолларынъа.
Багъчамызда ойнайыкъ гуллерни къокълап,
Сабадан акъшамгъадже кулип, шакъылдап.
Энъ юксек тепеден багъыраджам адынъны,
Сен тек догъур мени, сен тек яшат мени.

Диляра "Сельсебиль" Абибулла (Ибрагимова) нынъ къыйметли къаткъыларынен. Джан-юректен минеттарлыгъымны бильдиремен :) Аллах разы олсын, достум :)