Инсан къум данеси киби
Сахра деген алемде,
Чешит ренкли чечек киби
Худжур такъдир элинде.
Тек шу назик чечечикнинъ
Инелери оськенде,
Тийме сакъын, сакът ол онынъ
Пытакъларын узьгенде.
Чечек озю ола биле
Эм къокъулы, эм сасыкъ.
Дюнья юзюн коре биле
Эм де джошкъун, эм басыкъ.
Эгер яваш ягъмур ягъса,
О рухлана ве гуллей.
Эгер сувсыз куньлер олса,
Яваш сола ве оле.
Инсан, назик чечек киби,
Тюрлене берип яшай,
Эм де беяз геми киби
Озю ялысыны сайлай!
Апрель 18, 2012 с.
Инсан - чечек
© Copyright: Эльмара Мустафа, 2012
Свидетельство о публикации №112041900852
Свидетельство о публикации №112041900852
Рецензии