Зи хиялар какахьнава, гъалар хьиз,
Жагъур тежез гьинва эхир, гьинва кьил.
Вилик гала шумуд суал, тIалар хьиз
АлкIанава, къачузвач хьи залай гъил.
Заз лугьузва рик1и акъваз тавуна,
Дегишара вуна жуван къилихар.
Са масада, мягькемдаказ руьгь кьуна,
Зулум гузва, кутазва захъ синихар.
Са рик1ини яб тухузва алахъна:
"Акъатна вач дерт авачир патахъ вун,
Тамир патав са ялтахни ялахъ на
Залай гъейри садахъ жемир ч1алахъ вун.
Дуст лугьудай душман вучиз агудна,
Чуьнухдайдан гъилер вучиз галуднач?
Вуна вучиз хаин винел акъудна
Адан чинин кьвед лагьай хам алуднач?"
Эхиз хьанач, шиир кхьиз ацукьна,
Гъамар цIуриз элкъурда за цIарариз.
КIан хьана заз, рикIин къене са цIукна,
Жавабар гун руьгь падзавай гарариз !
Вилик гала шумуд суал...
© Copyright: Билал Адилов, 2012
Свидетельство о публикации №112013008602
Свидетельство о публикации №112013008602
Рецензии