Мугьман я зул чи патариз,
Цифер къвезва мад сувариз.
КьецIил хьанва тарар-тамар,
Саки къати хьанва гъамар.
Амач либас къацувилин,
Хъуьрезамач гуьгьуьл чилин.
Са варз вилик гуьлуьшан тир…
ЧидачтIа квез лугьун и сир:
ТIебиатдин навар я им,
Атанва зул, хъфенва чим!
ЧIерейрилай алахьиз физ
Марфар къведа лугьуз тегьер.
Тади галай гуьруьшдиз физ
Муьгьуббатдин уьруьшдиз физ
КIанибурун чIурда кефер …
Яргъавай яр рикIел хкиз
Жедачни бес уьмуьр зегьер,
Чубарукдин ичIи муг хьиз
Кумай кIаник зи чIередин…
Къведачни ваз гила къегьер
Акваз сефил и дередин?
Гьинихъ я рехъ, куь дурнаяр,
КичIе яни къаярикай?
Зи гафар лагь акуртIа яр,
КIанивилин цIаярикай:
АватIани зи ругьда зул,
Туьхъуьдач гьич ашкъидин къул!
Вил рекьеллаз гад гуьзетиз
Юзазва зун, зулун пеш хьиз…
Зул атана...
© Copyright: Билал Адилов, 2012
Свидетельство о публикации №112012106617
Свидетельство о публикации №112012106617
Рецензии