Заз чидачир, ашкъидин цIай вуч ятIа,
Туна на зун цIайлапанра, ялавра.
Байихначир, гьижрандин къай вуч ятIа,
Экуь уьмуьр гьатна хьи зи чIулавра.
Заз чидачир, шииратдин цIар вуча,
Гана къелем на мажбурна зи гъиле.
Низ чидай хьи, муьгьуббатдин хар вуча,
Шаирвилин савда гьатна зи кьиле.
Заз чидачир, азаб вуча, гъам вуча,
Къеняй ргаз йифер-йикъар какахьна.
КIанивилин гьуьлер вуча, кам вуча,
Аян хьана ашкъи, сел хьиз, авахьна.
Заз чир хьанач им сир яни, я ахвар,
Са суьгьуьрдихъ кутуна зун алчудна.
ГьикI атанай –гьакI хъфий и байихар,
Аман минет, жувахъ галаз хутах на.
2010
Шаирвилин савда гьатна зи кьиле...
© Copyright: Билал Адилов, 2012
Свидетельство о публикации №112012105332
Свидетельство о публикации №112012105332
Рецензии