Тийналлин мукъаме дуьйлу,
Ахбеттан зIаьнарша дуьйцу.
ХIара ду буьйсанан туьйра,
Я ю и туьйране буьйса.
Долушдерг, вайн хиндерг, хилларг
Бен хетац, дага ца туьйсу.
Самукъан бохь иштта хилла-кх –
ХIара ю туьйране буьйса.
Со бIозза лийр хилча, амма
Цкъа иштта ирс кхачахь буйна,
Вайн дахар эрна дац данне –
ХIара ду буьйсанан туьйра.
Сахуьлуш дог дIа ца туьй сан,
И дог ду, и муха туьйр ду,
Чекхйолуш туьйране буьйса,
Чекхдолуш буьйсанан туьйра?
Хастам бо, хастам бо хьуна,
ХIай, буьйса, дахаран меха.
Цкъа юхаерзахьа суна,
Ас эр ду: «Со шозза веха!»
Тийналлин мукъаме дуьйлу
© Copyright: Шарип Цуруев, 2012
Свидетельство о публикации №112011909703
Свидетельство о публикации №112011909703
Рецензии