КIанивили каначиртIа. Гьуьжетун Билал - Эйваз

БИЛАЛ
Шаир Эйваз, ша чун рахан
Ашкъидин  хуш  гьаларикай.
Чаравили, рикIиз дакIан,
Руьгьда твадай къаларикай

ЭЙВАЗ
Жедачирни, я чан шаир,
РикIел тIалар гъаначиртIа?
Кьвал хьтин, зун туна фагъир,
Хередин кар ханачиртIа?

БИЛАЛ
ТIебиат  хьиз, я кIанивал:
Гагь цIай  жеда, гагь къайивал.
Белки хъсан  я хьайивал,
Хабар   хьана  таларикай?

ЭЙВАЗ
Къвез хъфена  мецин кIуфал
РикIи кхьей ашкъидин чIал,
Зун са масад жедай, Билал,
КIанивили каначиртIа.

БИЛАЛ
Гьахъ я, Эйваз,  жедач эхиз
КIанивал я са дерт чIехи.
ХьайитIани чIарар рехи,
Кхьихь на  гьа  чIаларикай.

ЭЙВАЗ
Эхна цаву, эхна чили,
Тал чIугвачир икьван кьили.
РикIин кьиле и кьве вили
Ашкъидин цIир цаначиртIа.

БИЛАЛ
Ашкъиди заз селер гъана,
Гагь тал гана, гагь дад гана.
Уьмурда  зи гелер хьана
Са таватдин  халарикай.

ЭЙВАЗ
Вил, булах хьиз, шедачир жед,
Хиялдиз цIар къведачир жед,
Чилел шаир жедачир жед,
ЧIехи ашкъи хьаначиртIа!