Машгьур жез к1анз авур къелет

Теснифна са шумуд шиир,
Ракъурнай за газетдиз,
Акъатунал вил алай зун,
Акъвазнавай гуьзетиз.
Вахчуз хтай "Лезги газет"
Къекъвезвай лап кьарайсуз:
Чапнават1а зи эсерар
Шад ийидай кьадарсуз.
Къвез, алатиз физ гьафтеяр,
Хквез хьана газетар,
Амма, анжах гьич садани
Авачир зи "зегьметар".
Фикирна за, белки жува,
Герек ят1а гъун рик1ел?
Авуна зенг, авай нумра
Мерд Алидин завотдел.
Рик1и гуп-гуп ийизвайт1ан
Суал гана вик1егьдиз,-
Зи шиирар, Мерд Жалилов,
Мус акъудда газетдиз?
Шуьк1уь ванци кьуна хабар:
Авурди вуч гъун ар я?
Шиир? Гьинва? Аквазвайбур
Ц1иргъедавай ц1арар я.
Зурзана гъил. Хкудна за
Таки гьалда телефон,
Япарамай Мерд Алидин
Туьнбуьгьзавай хци ван:
-Жуьрэтзава вучиз на, руш,
Шаирвилин рекьиз физ!
Рифма жагъай гафарин ц1иргъ
Ракъурмир чи газетдиз!
Алахъунар гьак1анбур я,
Авач талант, аквазва,
Инжиклини ийимир мад,
Шаирар чун авазва...
Амукьнач захъ лугьудай гаф,
Туьгьметрин сан яргъи я.
Машгьур жез к1анз авур къелет
Тикрар хъийиз регъуь я.
Кхьизва за акъваззавач,
Хиялрикай жезва ц1ар.
Ц1арарин ц1иргъ  яргъиди я,
Шиир? Нивай кьан хабар?