Аваз хьурай Перизада япара...

Лагь вуна са «Перизада», Магьире,
Миливилив чукIурай хуш авазар,
Ви ван хьурай  гьар шегьерда, гьар хуьре,
ЦIрадайвал  руьгьера мурк - аязар.

Лагь вуна са «Перизада», фидайвал
Зи хиялар Шагьдин суван синерал,
Са легьзеда вилин кIаник гъидайвал               
Сусар, рушар, хунча алай къуьнерал.

Лагь вуна са «Перизада», лагь, я руш!
Хкведайвал рикIел лезги мехъерар,
«Гьай мерженар»,«Чамар гьалун» - гьикьван хуш,
Экуьн кьиляй къавал ядай «Сегьерар»…

ГьинаватIа чIалан зурба арифар,
Чамран кIвализ атуй  гафун къарихар,
Билбилри хьиз, ийиз сусан тарифар,
Къуй кутурай йенгедихъни «синихар».

«Цикар галай» кьуьл авурай  жегьилри,
Гъил-гъилеваз, рушни гада какахьна,
Шад жедайвал рикI, акурла, сефилрин,
Капар ягъиз, руьгь кьакьандиз акъахна.

Вучиз чIуру хьанватIа чи  ванерни,
«Лолитайри»-«Миленайри» кьунавай,
Ван хьайила, алугдачни къенерни,
Чара макьам лезги гафар тунавай.

Гьиниз физва чи манияр, адетар -
Аваз чара, гафар чара, руьгь чара?
Дeгиш тийин, ша, къилихар, хесетар,
Лагь, жедайвал «Перизада» япара!