Эвернава заз мехъерик вун авай,
Хиялзава, фидани зун, фидачни.
Шумуд йис я къакъатнава чун чавай,
Гуьруьшди чаз дад гъидани, гъидачни?
Гьа эвел хьиз чуьнуьхда жал чин вуна,
Са легьзеда акьурла вил вилера?
Яру хьана хъуьхъвер мадни къекъифна,
Ашкъидин тIал къарагъдатIа кьилера?
РикIе ама лугьуз тахьай гафар зи
Вахтар фена, элбет, элкъвей гъамариз
Галукьайла яраб руьгьдик шагьвар ви
Гьиссери кьел вегьидатIа хамариз?
РикI захъ галаз ава яман гьуьжетиз-
«Ам бахтавар тирди бес ваз чидачни?»
Гьа икI суал ама жаваб гуьзетиз:
«А мехъерик фидани вун, фидачни?»
Фидани зун, фидачни?
© Copyright: Билал Адилов, 2011
Свидетельство о публикации №111122100402
Свидетельство о публикации №111122100402
Рецензии