Регъуь я заз

Гьик1 жезва заз ,бейкар хьунвай,инсанар,
Яваш-яваш гьайванариз элкъвезва,
Квадарзавай тафаватлу лишанар,
Вагьшияр яз чи арайра къвекъвезва.

Пич1и кьилер, мефт1 бейгьушдив ац1урай,
Дуьнья тирвал  к1ват1алзава азгъунри,
Мажбур ийиз кьиле тухуз буйругъар,
Чанариз къаст ийиз тазва къанлуйри.

Келлегуьзри хушреканрин чилерай
Дадмишзавай зегьер,кутур вирт1едик,
Телефзава бейхабардиз гьиссерай
Ац1ай рик1ер, вил галамай дуьнедихъ.

Яшамиш жез къанни кьве  виш йисара,
Регъуь я заз шагьид жез и вахтарин,
Какахьнавай дуьзни патахъ шарт1ара
Лук1ар хьанва ксар кьац1ай пуларин.

Ракъинин нур гележегдин несилрин
Алахънавай мич1ивилив басмишриз
Есирвилиз хушуналди эмиррин
Физвайбуруз жедач завай багъишиз.
 
Регъуь я заз, хьайид я мад дявеяр,
Халис эркек женгера жед  вилерик,
Къе «итимар» хъиткьинариз бендеяр,
К1еви жезва дишегьлийрин ценерик.

Гьалдариз сад садал, чун чаз так1анриз-
Фагьум ая, четин туш кьил акъудун-
Миллиардар гьайиф къвезвач  душманриз
Эрзиман тир ватан чавай къакъудун.

Башчиярни гъилибанар, иблисар,
Ухшар куцар къекъвезвай чи арайра,
Ише- кьиле тефидай гвай силисар,
Чир хьухь, куда куь кьисасдин ц1аяра!


                2011-03-09