Со вижнехь, со вижна ма вита совнах,
Вижна Iар ас дахар лерина дац.
Вижна Iан лахьти чохь кхуьур ву сов а,
ХIара дахар шозлагIа суна хир дац –
Миччахь а, мелла а, мацца а дахарх,
Адаман хиларан маьIна ду дахар.
Цундела со сецна ма вита аша.
ТIехволург, доьху ас: меттаххьаве.
Лууш ву езачун со бIаьра хьажа,
Декхар ву со хIотта цомгашчун тIе.
Деза ас лулара жима бер хьаста –
Иза ду вайн хиндерг, и ю вайн бIаьсте.
Стага шен хаддийнарг бу цуьнан мах а,
Декхарш, тIедахканза, мел ду-кха уьш:
Ловзаргахь човс хилла, нах хелха баха,
Стаг веллехь, и дIахьош барма ойуш,
Автобус соцучохь догIа сайн тал а…
ГIуллакх дан сайх наха къонах ву аллал.
Со вижнехь, со вижна ма вита совнах
© Copyright: Шарип Цуруев, 2011
Свидетельство о публикации №111120110124
Свидетельство о публикации №111120110124
Рецензии