Ненан мотт, хьо бац и
Нохчочо хийла,
Къа-бала ялхаеш,
Бийцинарг, ша
Къоьллица боданехь
Воллушехь гIийла,
Сатуьйсуш лаьмнашкахь
Тасаре са?
Ненан мотт, хьо бац и
Иллешца хийла
Къийсамна гIиттадеш
Къонахчун дог,
Кхайкхаза веанарг
Корчуьйтуш цIийла,
Вайн лаьмнийн маршоне
Баьккхинарг ког?
Ненан мотт, хьо бац и
Ламанхойн сийнна,
Дуьненна даржийнарг
Бакъиллийн зов,
Теркан хих гIум санна
Сан цIийца ийна,
Сан кийра доьттуьйтург
Марзонан ов?
Хьо бу и, ненан мотт,
Сан ирсан хьоста,
Хьекъалан къайленийн
Бух боцу гIу.
Хьо маццаъ лийр белахь,
Лойла со тховса:
Ахь лерг ца хьоьстучохь
ХIун дахар ду?
Ненан мотт
© Copyright: Нурди Пашаев, 2011
Свидетельство о публикации №111110903145
Свидетельство о публикации №111110903145
Рецензии