Коломено паркина
Къекъвезва зун Коломено паркина,
Перишан тир цифери цав къунавай.
Дар жезва зи гьар камунал рикI ина,
Акурла тар, зулу кьецIил тунавай.
Сумагдал хьиз, чилел алай пешерал,
Яргъи хьанва урусдин руш кIунчIар къаз.
Бахтавар яз, байих тийиз ламувал,
Наз гузава патав гвайи канидаз.
Агъадикай атай вацIун къайивал
Вуч ухшар я серинриз чи патарин.
Къвезва чандиз са кьадар зи хайивал,
Акурла чиг и шегьердин паркарин.
АватIани кьуд пад къизил рангина,
ИчIивили галудзава руьгь къе зи.
Пашманвилихъ галаз ава женгина
Байихарни кIанивилин рекъе зи.
Къекъвез ама Коломено паркина,
Перишан тир цифери цав къунавай.
Гьам сефил я, гьам бахтавар зун ина,
Ашкъи галаз, вуна рикIе тунавай…
Москва.Октябрь 2010.
© Copyright: Билал Адилов, 2011
Свидетельство о публикации №111090700568
Свидетельство о публикации №111090700568
Рецензии