Qaylardasan sevgili janon

                Qaylardasan sevgili jonon,

                Yuragimni qon qildi hijron.
 

                Bilmam hozir ne kechar holing,

                Mendan olis nechun visoling.
 

                Iztirobim qay dilga yoray,

                Kimga boray, kimdan axtaray.
 

                Seni izlab sohillardan o,

                Dengizlarda suzayinmi yo.
               

                Yo dashtlaru-qirlarni kezib,

                Hayqiraymi olamni  buzib.
 

                Tog’u-toshni tutaymi makon,      

                Mashrab kabi bo’lib lamakon.
 

                Nechun jimsan, nechun bu alfoz,

                Men tarafga bermaysan  ovoz.
 

                Nahot so’nik tovushim mening,

                Dilginangga  etmagan  sening.
 

                Yoki sevgim rad etganmisan,

                Va  abadga  bad  etganmisan.
 

                Ne bo’lsa ham ko’ngil ardog’im,

                Men ovvora  izlagan  chog’im.
 

                Shunda bo’lsang gar haqiqatdan,

                Ogoh qilib  bor haqiqatdan,
 

                Dardingni ayt, muddaongni ayt,

                Qaytib kelmas boshqa bunday  payt.

                2005.