Зама йоьду, шен ма-хуьллу хьаьдда,
ЮьхьтIе етташ дIадаьллачун чан.
ЙогIий-кхочий сан оьмаран хьаьтта,
Хийла хадий цо сан ирсан гIан.
ХIан-хIа, цIерхазамна ас ца биъна
Замане суо къар ца вайта дуй.
Суна дукхе-дукха хьалха хиъна
Лаьттахь иза эшош собар дуй.
Ас цундела хьалха лоьллу мАса
Хенан новкъахь сайн поэзин дин,
БIаьрца маракъуьйлуш лаьмнийн Аса,
ТIехьа дуьтуш сингаттаман Iин.
Сайн оьмаран чоь мел хиларх готта,
Лало соьга денойн чорда дукъ.
Дезча мостагIашна дуьхьалхIотта
Тухур бац ас, кхеравелла, букъ.
Ловр ду дерриг. Амма бу цхьа кхерам:
ХIун дийр ду ас езар кхетта лахь?
Гихь дIахьур бу хено сан синкъерам,
Со векалвеш накъост лаца - яхь…
Хоттане, 1981 шеран май
Зама
© Copyright: Ибрагим Юсупов, 2010
Свидетельство о публикации №110110108786
Свидетельство о публикации №110110108786
Рецензии