Меним юрегимде юз бинъ къайгъы яшай,
Олар къуртлар киби мени яваш ашай.
Душманларым куле, достлар янып юре,
Чаре булмакъ ичюн керекми ольмеге?
Дюнья юзю манъа къара зиндан олды,
Саф фильджаным энди кедер иле толды.
Агъры къафесине бульбульдай тутулдым,
Кедер диварына туралмай урулдым.
Яраланды меним назик къанатларым,
Омюр онъа атты кескин ташларыны,
Эм ёрулды юрек куреш ёлларында,
Чектим нидже азап такъдир къолларында.
Вакъыт исе кече… Эр шейни огрете,
Яраларны яхшы, рухны кучьлю эте.
Гонъюль яваш къура энди къатты къале,
Онъа кирип олмаз ич бир агъры, нале.
Гъарп еллери бутюн сынъырларны йыкъты,
Булут арасындан алтын кунеш чыкъты.
Дженнет багъчасында чечек ачты бир гуль,
Онъа куньде къона энди гузель бульбуль.
Июнь 30, 2009 с.
Бульбуль
© Copyright: Эльмара Мустафа, 2010
Свидетельство о публикации №110040800076
Свидетельство о публикации №110040800076
Рецензии