Йоккхатоьпан кхаба
Юьртайистте Iенаш,
Стешха дуьйлу набарх
Берийн мерза гIенаш.
Церан къинойх вогуш,
Со кху юьртах ваьлча,
Суна “орцах” вогIург,
Хьан хIуттур бу аьлча .
Хьайна хIуьттаренна
Со кху бухахь висча,
Аьшпаш харц дуьненна
Буьттур бу ахь биссалц.
Хьуна гергахь, тIаккха
Хир со цIармат экха,
Дийнна дуьне даккха
Арадаьлла, текхаш.
Сан бехказло ерг а -
Дерриг дуьсур соьца.
Ур-атталла лерг а
Ухьур дац ахь соьга.
Суна сайнна бала
Хир бу цунах тIаккха:
Орца доцуш - дала,
Орца доцуш - даккха.
ХIара-м ас цкъа лайна
Къемат ма дарий-ца,
Цундела ца тайна,
Юха долош дийца...
Йоккхатоьпан кхаба
Юьртайистте Iенаш,
Стешха буьйса набарх
Юьйлу, тIамна Iемаш.
Йоккхатоьпан кхаба...
© Copyright: Адам Ахматукаев, 2009
Свидетельство о публикации №109050602256
Свидетельство о публикации №109050602256
Рецензии