Кхехкаяьлла аьхке.
Берахьлера сурт.
Зудабераш даьхки
Лийча Мартанчу.
Ца хьежийта цаьрга,
Луьста яьлла хьун.
Амма берийн бIаьргех
Лачкъалур ду хIун?!.
Йоккхо цхьаъ ю цаьрца,
Лечкъаш дитта кIел:
Некхе цхьа куьг лаьцна,
Важа - цIонги кIел.
ДIасахьожий, гергахь
Тебаш цхьа а вуй,
Йодий-йодий, бердах
Кхоссало и чу.
Къайлайолий логгец,
Хьалакхоссалой, -
Генайолий гIоддец,
Марта делхадо.
Хих ца Iеба жовхарш
Ловзу цунна тIехь -
Кху дуьненан ховха
Экама ши ах.
...Марта охьадахна,
Тхан шераш а хьош.
Иза маре яхна, -
Деша вахна со.
Берахьлера аьхке
Дагалецамехь
ТIаьхьалела, бехках
Даккха, бохуш, эхь.
Амма иза яйча,
Самадолу сан
Дуьххьарлера айса
Лайна божа гIан.
Кхехкаяьлла аьхке...
© Copyright: Адам Ахматукаев, 2009
Свидетельство о публикации №109042402960
Свидетельство о публикации №109042402960
Рецензии