Нохчийчоь. Митингийн майда

Нохчийчоь. Митингийн майда.
Легашка гIерта потенци .
Халкъана, махкана пайда
Лоьхуш бу са-аьрха кIентий.

Къаноша къийбина хьехам,
Къеначух къона ца къаьхкаш,
Iехаме берзийна лехам,
Кхехкаш ю къамелийн аьхкаш:

- ТIаьрсигех яьккхина майда...
- Яхкьелла интеллигенци...
- Маршонан юьхь тIера кIайдарг...
- ДIаели шун компетенци ...

- Маршо я Iожалла - цхьаъ бен...
- Маршо вайн декъала кхаж бу...
- Маьршачу дуьненна кхаъ бе...
- Кавказ а вайх тешна Iаш ю... -

Ловш оцу кхайкхамийн дагар,
Тхьузйоьлла интеллигенци,
Хьуна а хьаьвзар бу бIагор,
Хьайн цIарах еш интервенци .

Батта чохь шаьлтанах терра,
Экама къийлина дош хьан
Цхьаммо а ца хьокхур лергах,
Iедало васхала  хьош хьо.

Циггара яьлча хьо тIома,
Ун даьлла тхьамдаллин хьунах ,
Къам хила ца дуьтург къомах
Iедал дуй, хуур ду хьуна.

Къомах цо йиначу тIоьлгийн
Къа лайна, егийча оьмар,
Цо а шен кхел йийр ю:”Жоьлгийн
Iедал ду хийцалуш соьмах”.

Къаро еш, бехкала гIор я
Къардер ахь ношделла бехкаш,
Тишъелла уьйраш ца шоръян,
Къомах а IиндагIах къехкаш.

Хьо юкъаозийнчу поло
Дерзош и лечкъаргех ловзар,
Некъ боцуш вовшашка боло,
Хир ду-кха вай юхадовзар.

Тешийна эшнарг а къам дуй,
Эшийна тешнарг а къам дуй
Хуъушехь, вовшех ца тайнарг
Ма боккха эшам бу вайна.