Вай хІунда къаьстина, хІунда?
Дарбане доцу и хаттар
Нахала даьллехь а атта,
Жоп а ца карий кхин суна-м.
Леха а дера ма лийхи,
Чехийна шеконаш луьттуш.
Аьхна сан гІевланга хІуьттуш,
Хьох йисна марзо а лийли.
И дегІах хьаьрчинчу хенахь,
Мерзачу къиноша гІиттош,
Къехкий ас, юьхьІаьржа хІиттош,
Хьо хьарамъяьккхина гІенаш.
Иштта ма варий со, иштта,
Со-сайна вевзина ваьлла,
Мехкарийн пхьоьхана ваьлла,
Хьан сица са ийна висча.
Иштта ма висна со, иштта
Сайн дагалецамийн хьехахь.
Хьоьгий бен, цхьаьнгга а деха
Жоп доцуш, хаттар а дисна.
Вай хIунда къаьстина, хIунда?
© Copyright: Адам Ахматукаев, 2009
Свидетельство о публикации №109042402847
Свидетельство о публикации №109042402847
Рецензии