Кисанахь ловзучу шайнаша
Кхетамна ваьккхича гена хьуо,
Iехалуш самахчу гIенашна,
Хьовзор бу ахь керла хенагуо.
Хьайн берийн хенара нускалан
Цхьа тайпа цIартIе а даьккхина,
«Нийсачу» нахе дIанисвала
Мекх а дIадоккхур ду хьаьккхина.
Кхаъ белла балха дIахIоьттина,
Болар а, къамел а тодина,
Лелар ву, кепа чу воьттина,
Хьаналчу дегнашна муо бина.
Дозанал ара а баьккхина,
ЦIеношна пеннал бух буттур бу,
Хьийзош хьайн куьйга кIел баьхкинарш,
Хьаькамна муьтIахь чухIуттур ву.
Цунна тIе ламазаш дерзадеш, –
Цул деза ца гойтуш хIумма а, –
Цу Iамалх дахаран терза деш,
Дуьтур ду дуьненан суннаташ.
Цу декъалхиларо хьаьсттинчохь
Дахаро хьо юьстахкхоьссича,
Юха а денлур ву хIумма а
Йоцучу хIуманийн умматехь.
Кисанахь ловзучу шайнаша...
© Copyright: Адам Ахматукаев, 2009
Свидетельство о публикации №109040205239
Свидетельство о публикации №109040205239
Рецензии