Адвечныя пытаннi

 Згубіць жыццё, згубіцца ў жыцці?..
 Як добра – разважанні на канапе:
 Дзе лепей на сусветнай мапе
 Згубіць жыццё, згубіцца ў жыцці?!

 Купіць спакой, купіцца на спакой?..
 За грошы ўвесь сусвет прыдбаць у куфар,
 Лавіць нірвану, ды не весці вухам.
 Купіць спакой, купіцца на спакой?..

 Ахвярай стаць, ахвяру скарыстаць? –
 Пакарыстацца шматразовым гвалтам? –
 Калісьці не было саромна малпам
 Ахвярай стаць, ахвяру скарыстаць.

 Забраць гару, забрацца на гару
 І ўсім крычаць старую мудрасць зверху,
 Пакінуўшы без справы Магамета,
 Забраць гару, забрацца на гару.

 Быць слуханым і, урэшце, быць пачутым –
 Ці шмат атрэбна страннаму месіі?
 Як ветрыку – аратару стыхіі –
 Быць слуханым і, урэшце, быць пачутым.

 І зразумець, і зразумелым быць
 Паміж сяброў і абыякавых зявакаў,
 Знайсці адказаы між магічных знакаў
 І зразумець, і зразумелым быць.

 Знайсці сябе, знайсціся ў сябе…
 Адказы на ўсе сусветныя пытанні
 І ўрэшце – урэшце скончыць разважанні:
 Знайсці сябе, знайсціся ў сябе.
 2.10.2005г.