4. манияр

Ирандин шагь - Надир-Шагь вичин кьушунрихъ
галаз Дагестандин халкьари чкурай вахтунда
лагьанвай манияр.

Деред сиве карвансара
ЦIай аватна, кана эллер.
Ирандихъай атай гавур,
Пехъи я вин кицIин вилер.

Серкер,аман, гьарай хьуй ваз!
Рехъ гумир, девлер атана;
Къабанарин суьруь ч1ехи,
Къаралмиш кьеркьер*, атана

Гияр* шегьер ялавд кьула,
Къизил, гимиш цIраз, авахьиз;
Кьеркьер алай афтафаяр
Пад жезва гьакI яд кIвахьиз.

Сарай* цик1ей ч1улав гьалак,
Бес я т1уьна инсандин як;
Иланриз есир хьай Зугьгьак,
Ваг агакьдач мар, къаралмиш.

Къелед сенгер еке гьамбар
Мейитар я, аван(и) хабар?
Гапур авай гъил я къабар,
Вуч я и агь-зар, къаралмиш?

Мурдар ксар пуч хьуй тамам,
Гьарам хьана са югь регьят.
Диде, вуна гъам ийимир,
Хаин хциз хъимир минет.

Ширван, Шеки маса гана.
Ханариз алпандин ялав,
Гъилер, келле ивида-вай
Нар къаралмиш, хиял ч1улав.

Яргъай чагьди атай къачагъ,
На ивидин вире чан гуй,
Ваз рехъ къалай а Зугьрабан
Лацу бармак накьвада хьуй.

Чулакъ Зугьраб, эл маса гай,
Намус авач, арни-хараб,
Вун элкъвена ин чархара
Гьатдач, яни икIа яраб?

Карвансара къуба беглер,
Куь парахра ялав ава.
Гил эхтибар хъийич элди:
Шайтанар куь къвалав гава.

Лезги, яхул, къарагь виниз,
Дидейрин мам квез гьалал хьуй,
Вегьа кемен*, галчIур душман!
Бес им чаз вучтин завал хьуй?

Къаралмишар атана мад
Хуп1 ламрал курчар хьанани!
Аш я лугьуз, гъил вигьейла,
Ц1у кана хабар хьанани?

Дербентдин гьуьл къутана пис,
Къелед цлав ивид булах.
Гьаргьар Надир атана гил,
Жуван падур шалвар хутах.

(Кьурагьай, Кьеп1ирдлай, К1иридай, Хъуьлидай, виридалай гзаф Кьурагьви кьуьзи Гьакимавай Меджидов Къияса кхьейбур я. Декабрь - 1931 йис)

Кьеркьер -виликди дяведа алук1дай ракьун перемар.
Гияр - виликди кьурагьрин т1вар тир.
Сарай - хандин, пачагьдин, шагьдин зурба к1валер.
Кемен - балк1анар ва маса гьайванар кьун патал вигьидай кьилихъ гьалкъа галай ц1ил.